नेपालले पहिलोपटक नेत्रहीन क्रिकेट विश्वकपको सेमिफाइनलको यात्रा गरेको छ । शुक्रबार दक्षिण अफ्रिकाले बंगलादेशसँग पराजय बेहोरेपछि नेपालले चौथो स्थान हासिल गर्दै विश्वकप सेमिफाइनलको यात्रा गरेको हो ।
नेपालले अब पहिलो सेमिफाइनलमा पाकिस्तानको सामना गर्नेछ । नेपाल र पाकिस्तानबीचको खेल आइतबार बिहान पौने ११ बजे मुल्तान क्रिकेट रंगशालामा हुनेछ ।
नेपालले लिग चरणमा ६ खेलबाट ६ अंक जोड्यो । नेपालले समूह चरणमा अफगानिस्तान र दक्षिण अफ्रिकालाई हराएको थियो । भारतले प्रतियोगिता नखेल्ने भएपछि नेपालले भारतसँगको खेलमा वाकओभर बापतको दुई अंक प्राप्त गरेको थियो ।
नेपालले लिग चरणको खेलमा दक्षिण अफ्रिकालाई ११ रनले हराएको थियो । यस्तै, अफगानिस्तानविरुद्ध नेपालले १ सय ८ रनको जित निकाल्यो ।
नेपालले पाकिस्तान र श्रीलंकासँग भने पराजय बेहोर्यो । नेपालले सन् २०१२ देखि नेत्रहीन विश्वकप खेल्न लागेको हो ।
